ايراندا حقّيميز - حقوقوموز !
یازار : ay han
+0 به یه ن
بوگونكو ايران آدلانان اؤلكه‌ده ياشايان ميلّتلر ، مين‌لر ايلدير بو اؤلكه ده ياشاميش و تاريخين آجيلي و شيرينلي خاطره لريني آرخادا قويموشلار.
هله اسلامدان قاباق ، اؤزلليكله ميلاددان قاباق يازيلان تاريخلر داها چوخ افسانه لرله قاريشيق اولسادا اسلامدان سونرا يازيلان ايران تاريخي مختليف تاريخچيلر طرفيندن چوخ آچيق – آيدين و مختليف ديللرده يازيلميشدير .
غزنويلر دؤنميندن قاجار دؤرونون سونونا قَدَر و ۱۰۰۰ ايل آرديجيل اولاراق بو اؤلكه يه حؤكم سورَن تورك امپراتورلاري و سلطانلاري دؤرونده اوچ ديل ، يعني تورك ، عرب و دري (فارس ) ديلي بير بيري‌نين يانيندا ايشلَنميش و گليشميشدير .
حتي فارس ديلي كئچميش مين ايلده شعر ديلينه و دربار ديلينه چئوريلديگينه گؤره و تورك سلطانلاري فارسجا شعر سؤيله‌ين شاعيرلره قيزيل و گوموش انعاملاري وئرديكده شاعيرلر شعرلريني داها چوخ بو ديلده يازيب سلطانلار دربارينا تقديم ائتميش و او زامانلاردا داها چوخ فارس ديلينده شعر ديوانلاري يازيلميش و بو گونه ميراث قالميشدير .
بير سؤزده دئمك اولار كي ، فارسلارين هخامنشلر و ساساني‌لر سلطانلاري دؤنملرينده هئچ بير ادبي اثرلري يارانماميش و اونلارين كئچميش قرنلرده يارانميش و افتخار ائده بيله‌جكلري فارسجا ادبي ، تاريخي و سايره اثرلري نين %۹۸ تورك سلطانلاري حاكميتي دؤرونده يارانميشدير !
اوچ ديلين تبعيض‌سيز بو اؤلكه‌ده ايشلنمه‌سي قاجار دؤرونون سونونا قَدَر داوام ائتميشدير ؛ لاكين رضاخان ايش باشينا گلندن سونرا يالنيز فارس ديلي ايراندا رسمي و اجباري تحصيل ديلي اولموش و غير فارس ديللرين ، اؤزلليكله ناصرالدين شاه زامانينندا و ميرزا حسن رشديه طرفيندن ايلك دفعه ايراندا مدرن تحصيل سيستيمي آذربايجان توركجه سينده و تبريزده درس وئريلديگينه باخماياراق بو ديلين تدريس و تحصيلي ياساق اولموشدور !
تاسفلر اولسون رضاخانين غير عادلانه قانونو بو گونه كيمي داوام ائتمكده دير !
ايران كثيرالمله بير اؤلكه دير ، بورادا يالنيز فارسلار ياشاميرلار كي ، اؤلكه‌نين بوتون امكانلاري فارس ديلي ، ادبياتي و فرهنگي اختياريندا اولسون . بو اؤلكه‌ده توركلرين جمعيتي فارسلارداندا چوخدور و ان آزي فارسلار قدري بو مملكت‌ده حقلري و حقوقلاري وار ، باشقا غير فارس ديللرين‌ده جمعيتلري اساسيندا اؤلكه امكانلاريندان فايدالانماغا حقلري وار .
بيز اگر بو اؤلكه‌ده ياشاييريق‌سا، فارسلاردان چوخ نفوسا ماليك اولماميزا باخماياراق فارسلار قَدَري اؤلكه امكانلاريندان فايدالانماغا حقّيميز وار يعني :
۱ – ديليميز رسمي و سرتاسري ديل اولاراق فارس ديلي ايله ياناشي ابتدايي‌دن توتدو بيليم يوردونون ( دانشگاهين ) سونونا قدر و بوتون تخصص‌لرده درس وئريلمه‌ليدير
۲ – فارس ديلي كيمي ديليميزده آكادمي ( فرهنگستان ) آچيلمالي و ديليميز لازم اولمايان يابانجي سؤزجوكلر و كلمه لردن سيلينمه‌لي و تورك ديلي‌نين كؤكلرينه داياناراق يئني سؤزجوكلر يارانماليدير
۳ – تهراندا سرتاسري تلويزيون كاناللاري‌نين تعدادي مثلا ۱۲ اولورسا، نفوس چوخلوغو اساسيندا اونون ۵- ي توركجه ، ۵- ي فارسجا، و ۲- سي باشقا غير فارس ديللره حصر ائديلمه‌لي و وئرليش يايماليدير، راديو وئرليشلري‌ده بو نسبت اساسيندا بؤلونمه‌ليدير
۴ – فارس موسيقي‌سي گليشمه‌سينه نظرده توتولان بودجه و اجرالار تورك موسيقي‌سينه‌ده نظرده توتولمالي و اجرا اولماليدير، عين حالدا باشقا غير فارس موسيقي‌لرينه‌ده جمعيتلري چوخلوغو اساسيندا اؤنملي يئر وئريلمه‌ليدير
۵ – دؤلتي بودجه ايله مركزده نشر اولان مطبوعاتين ياريسي تورك و ياريسي فارس ديلينده اولماليدير و باشقا ديللرده‌ده اوستان مركزلرينده دولت بودجه‌سي‌ايله نشريه بوراخيلماليدير
۶ – دؤلت بودجه‌سي ايله حاضرلانان سينما فيلملري ،تلويزيون سرياللاري و تئاتر نمايشلري ايكي ديلده ( توركجه و فارسجا ) اولماليدير
۷ – مجليس‌ده ، محكمه‌لرده و باشقا دؤلتي اداره‌لرده هر ايكي ديلين (توركجه و فارسجا ) ايشلنمه‌سي آزاد اولماليدير
۸ – رسمي و دؤلتي تابلولار هر ايكي ديلده (توركجه و فارسجا) يازيلماليدير
۹ – تورك ديللي شهرلرده ابتدايي و دبيرستان مكتبلري‌نين درسلري توركجه اولمالي لاكين فارس وطنداشلارلا ارتباط قورماق اوچون معين مقطع ده ، مثلا يئددينجي صنف‌دن دبيرستانين سونونا قَدَر ، بير كيتابدا فارس ديلي و ادبياتي بو مكتبلرده تورك ديلي يانيندا درس وئريلمه‌ليدير
۱۰ – فارس ديللي شهرلرده ابتدايي و دبيرستان مكتبلري‌نين درسلري فارسجا اولمالي لاكين تورك وطنداشلارلا ارتباط قورماق اوچون معين مقطع ده ، مثلا يئددينجي صنف‌دن دبيرستانين سونونا قَدَر ، بيركيتابدا تورك ديلي و ادبياتي بو مكتبلرده فارس ديلي يانيندا درس وئريلمه‌ليدير
۱۱ – هر شهرين جمعيتي تورك و فارس تركيبلي اولورسا ، هر ايكي ديلده و توركلر تورك ديللي مكتبلرده و فارسلار فارس ديللي مكتبلرده تحصيل آلمالي‌ديرلار ، بو مكتبلرده بوتون امكانلار برابر بؤلونمه‌ليدير
۱۲ – تورك ديللي شهرلرده يئرله‌شن بيليم يوردلارين ( دانشگاهلارين ) تحصيل ديلي مختليف بؤلوملرده ( رشته لرده ) توركجه اولماليدير ، لاكين بو بيليم يوردلاريندا فارس ديللي فاكولته‌لرده (دانشكده‌لرده ) اولماليدير ، بو فاكولته‌لرين تحصيل ديلي فارسجا اولمالي دير
۱۳ – فارس ديللي شهرلرده يئرله‌شن بيليم يوردلارين ( دانشگاهلارين ) تحصيل ديلي مختليف بؤلوملرده ( رشته لرده ) فارسجا اولماليدير ، لاكين بو بيليم يوردلاريندا تورك ديللي فاكولته‌لرده (دانشكده‌لرده ) اولماليدير ، بو فاكولته‌لرين تحصيل ديلي توركجه اولمالي دير
۱۴ – تورك و فارس تركيبلي شهرلرين ( تهران و كرج كيمي ) بيليم يوردلاريندا هر ايكي ديلده و مختليف تخصص‌لرده فاكولته‌لر اولماليدير
۱۵ – فارس ديلي كيمي تورك ديلينده ده دؤلت بودجه‌سي ايله سئمينارلار قورولمالي و تورك ديلي اوزمانلاري بو سئمينارلارا دعوت اولمالي و تورك ديلي ساحه‌سينده آراشديرمالار آپارماليديرلار
۱۶ – توركلرين دوزگون تاريخي يازيلمالي و مكتب – مدرسه و بيليم يوردلاريندا تدريس ائديلن عرقچي و آريا يؤنلو نژادپرستانه تاريخ اصلاح اولماليدير
۱۷ – بوتون ساحه‌لرده فارسلار و غير فارسلار آراسيندا برابر حقوق پروقراملاري نظرده توتولاراق اؤلكه‌ده دوستلوق، انسان سئورليك و انسانلارين ديل، اينانج و سوي -كؤكلريندن آسيلي اولماياراق قاريشيليقلي (ايكي طرفلي و برابر ) سايغي و سئوگي دويغولاري گوجلنديريلمه‌ليدير.
۱۸ – اؤلكه نين مادي و اقتصادي امكانلاري و ميلّي سرمايه‌لري يالنيز مركزي شهر و بؤلگه‌لرده يوخ ،بلكه اؤلكه‌نين بوتون شهرلري و بولگه‌لري‌نين برابر گليشمه‌سي و توسعه تاپماسي اوچون هزينه اولمالي و اقتصادي جهتدن دالي قالميش بؤلگه‌لرده داها چوخ سرمايه ايشه آپاريلمالي دير .
